Inkastoo 90% dhabar xanuunku ka imaado Murqaha ama Seedaha dhabarka oo adkaada hadana waxaa jiro waxyaabo kale oo dadka qaar dhabar xanuunkooda lala xiriiriyo mid kamid ahna waa cadaadis fuula Neerfayaasha ku shaqa leh dareenka iyo awooda lugaha iyo qaarka danbe.

Neerfaha ugu badan ee Cadaadiska carjo ama laf iyo wax lamid ah saarmaan waa neerfaha ugu weyn jirka oo loo yaqaan Sciatic Nerve kaasoo kasoo baxa Xangulaha qaybta hoose ee Dhabarka wuxuuna maraa barida, qaybteeda gadaale ee bowdada ilaa Jilibka gadaashiis halkaas uu u qaybsamo laba qaybood oo kala waraabinaya horada iyo gadaasha lugta iyo cagta.

Calaamadaha ugu badan ee lagu garto cadaadis fuula Neerfahan waxaa kamid ah Xanuun iyo Kabaabyo laga dareemo barida ilaa Ciribta.

Dhakhtarka si uu xaqiijiyo Xanuunkaaga wuxuu sameeyaa Fiisito ama iyo Baaritaano sida MRI Scan kadibna wuxuu qiimeynaa heerka darnaashaha xanuunka iyadoo badanaa bukaanada lagu xaliyo Jimicsi iyo daawooyin marka laga reebo bukaanada leh Xanuun joogta ah oo ay wax ka tari waayeen jimicsi iyo daaweynba, nolol maalmeedkooduna dhib ku haayo xanuunka iyadoona bukaanadaas loo sameeyo Qaliin cadaadiska looga qaadayo Neerfaha.

Jimicsigu wuxuu qayb weyn ka qaataa daaweynta xanuunka iyo dhamaan xanuunada dhabarka iyadoo Jimicsiga hoose yahay midka ugu badan ee dhakhtarku kula taliyo bukaanada xanuunkan qaba. Fadlan la tasho Dhakhtarkaaga oo Jimicsi uusan kuu qorin ha iska sameynin.